අහෝ මේ කුමන අරුතක්ද මිනිසුනේ.....?????

                                   මම කොනකට වී බලා සිටියෙමි.පුංචි පුංචි කහ පාට විදුලි බුබුළු මැද දහ අට රියන් උස බුදු සමිඳු පෙනෙන අපූරුව හිතට ගෙනාවේ කියා ගන්න බැරි තරම් නිරාමිස සතුටක්.ඒ සතුට විඳින ගමන්ම මම බලන් හිටියෙ කඩි ගුලක් වගේ දුවන මේ මිනිසුන් දිහා.බුදු සමිඳුගෙ දෙපතුල් කඩිමුඩියෙ මල් වලින් සඟවන මේ මිනිස්සු මේ හනි හනිකට දුවන්නෙ කොහෙද කියලා මමත් පොඩි විපරමක් කළා.එතකොට තමයි මට තේරුනේ දේවාලය ළඟ ඇයි මේ හැටි පෝලිමක් කියලා.

                                            බුදු හාමුදුරුවො දේශනා කරන ලද කිසිම බණ පදේක මම අහලා තිබුනෙ නෑ මිනිසුන්ට වඩා දෙවියන් උසස් කියලා.ධර්මය රකින්නාට දෙවියොත් වඳිනවා කියලා තමයි මම නම් දන්නෙ.අද ගොඩක් උදවිය එහෙම නැති නිසාද දන්නෙ නෑ මේ දෙවියන් ළඟ වැඳ වැටෙන්නෙ.

                    ඇත්තමට මේක මගේ හිතේ නම් හැමදාම ඇති කළෙ උපහාසයක්.මං කියන්නෙ නෑ දෙවියන්ට පිං දෙන්න එපා කියලා.ඒත් උසස් මනසක් තියෙන මිනිස්සු දේවාල ගාව දණින් වැටෙන කොට ඒක මොන තරම් විහිළුවක්ද..මම නම් හිතන්නෙ දෙවියොත් හිනා වෙනවා ඇති....

                             එක අතකට මෙහෙමත් හිතෙනවා..අද මිනිස්සු කරන දේවල් දිහා බැලුවම දෙවියන්ට වඩා මේ මිනිස්සු ගොඩක් පහත්...ඒත් උතුම් මිනිස්සුත් ඉන්නවා..එයාල ‍හරි අඩුයි මේ සමාජයේ..

පූජ වට්ටි දෝත අරන් වැඳ වැඳ යනවා

මහ දානෙට පඬුරු දදී පිහිට යදිනවා

පිනට කියා දුන්න පඬුරු අල්ලස් වෙනවා

විය සිදුරෙන් සඳ බල බල මඩේ ලගිනවා

පෝය හතරෙ සිල් අරගෙන බවුන් වඩනවා

දෙවොල බිමේ පොල් අරගෙන හොඳට ගහනවා

කාසි පඬුරු තැඹිලි ගෙඩිය උඩින් වඩිනවා

මිනිස් භවය දෙවියන් ළඟ දෙකට නැමෙනවා

යාතිකා හඬින් මුව අග සිනා පිපෙනවා

දහම ගෙන ඔතා පඩුරක කණුවෙ බඳිනවා

මදහසින් බුදු හිමිද නෙතඟින් නුඹව දකිනවා

තනි මමද කොන් වෙලා හිමියනි බලා ඉන්නවා

                 දෙව්න්දර ගිය වෙලාවක තමා මට මේක හිතුනේ.ඒත් මේක මං දන්න අය එක්ක කිව්වම ගොඩක් අය මට හිනාවුනා..
      මට සුන්දර ආගමක් තියෙද්දි කෙදිනකවත් බිඳිය නොහැකි...දාර්ශනික පදනමක් තියෙද්දි...උතුම් ජිවිතයක් ගෙවන විදිය බුදු හාමුදුරුවො..ඒ කියන්නෙ ම‍ගේ ආගමික ශාස්තෘවරයාණන් දේශනා කරල තියෙද්දි මම මේ වැඩේ දිහා උපහාසයෙන් නැතුව වෙන කොහොම බලන්නද.....